सुनसरी,१३असोज। सप्तकोशी नदीमा पानीको बहाव ५६ वर्षयताकै उच्च बिन्दुमा पुगेको छ। कोशी ब्यारेज कन्ट्रोल रुमका अनुसार आज बिहान ३ बजे गरिएको मापनमा नदीको बहाव प्रतिसेकेन्ड ६ लाख ४३ हजार ५ सय ४० क्युसेक पुगेको छ। यसअघि सन् १९६८ अक्टोबर ५ मा सात लाख ८८ हजार दुई सय क्युसेकको रेकर्ड बनाइएको थियो।पानीको सतह निरन्तर बढ्दै गएपछि कोशी ब्यारेजका सबै ५६ ढोका खोलिएका छन्। जलसतह खतराको तहभन्दा ११.२६ मिटर माथि पुगिसकेको र अझै बढ्ने सम्भावना रहेकोले सतर्कता अपनाउन प्रशासनले अनुरोध गरेको छ।
सप्तकोशी नदीको जलस्तर खतराको तह नाघेपछि उदयपुर, सुनसरी र सप्तरीका तटीय क्षेत्रका बासिन्दालाई सुरक्षित स्थानमा सर्न आग्रह गरिएको छ। कोशी ब्यारेज भएरको आवागमन अर्को सूचना जारी नहुञ्जेलसम्मका लागि बन्द गरिएको छ।
