काठमाडौं,१४ असोज। देशका विभिन्न ठाउँमा जनधनको ठुलो क्षति भएको भीषण बाढीपछि प्रभावित क्षेत्रको अवस्था भयावह बन्दै गएको भन्दै नेकपा (माओवादी केन्द्र) निकट अखिल नेपाल किसान महासंघ (क्रान्तिकारी केन्द्र) ले सरकारको उदासीनता र विपद् व्यवस्थापनमा देखिएको कमजोरीको चर्को आलोचना गरेको छ।
महासंघले जारी गरेको विज्ञप्तिमा कार्यवाहक प्रधानमन्त्री र रक्षामन्त्रीको अनुपस्थिति, गृहमन्त्रीको गैरजिम्मेवारपूर्ण अभिव्यक्ति र सरकारको ढिलासुस्तीप्रति गम्भीर आपत्ति जनाएको छ। विज्ञप्तिमा भनिएको छ, “विपद्को यस्तो घडीमा सरकारका उच्च पदस्थ व्यक्तिहरूले भद्दा मजाक गरेर समय बिताउनु र प्रभावित जनताको पीडामाथि नुनचुक छर्किनु दुःखद हो।”
महासंघले सरकारलाई तत्काल प्रभावित क्षेत्रमा उद्धार कार्य तीव्र पार्न, राहत वितरणलाई प्रभावकारी बनाउन र क्षतिपूर्ति दिने व्यवस्था मिलाउन जोडदार माग गरेको छ। साथै, महासंघले भविष्यमा यस्ता विपत्तिबाट बच्न आवश्यक पूर्वतयारी गर्न र पर्यावरणमैत्री विकासको मोडेल अपनाउन सरकारसँग आग्रह गरेको छ।
