ललितपुर, १५ असोज । ललितपुरको नख्खु क्षेत्रमा बाढीले घरबार गुमाएका पीडितहरूले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’समक्ष आफ्नो पीडा सुनाउँदै राहत र पुनर्स्थापनामा तत्काल पहल गर्न आग्रह गरेका छन्।
प्रचण्डले पीडित क्षेत्रको भ्रमण गर्दै उनीहरूको अवस्था बुझेका थिए। पीडितहरूले बाढीले घरबारविहीन बनाएको, बालबालिकाको पठनपाठन प्रभावित भएको र अझैसम्म उचित राहत नपाएको गुनासो गरेका छन्। उनीहरूले सरकारले विपद् व्यवस्थापनमा देखाएको ढिलासुस्तीप्रति असन्तुष्टि जनाउँदै प्रचण्डसँग आफ्नो पीडा कम गर्न सहयोगको अपिल गरेका छन्।
प्रचण्डले पीडितहरूलाई सम्बोधन गर्दै उनीहरूको पीडा आफ्नो पीडा भएको बताएका छन्। उनले पार्टीका तर्फबाट सक्दो सहयोग गर्ने प्रतिबद्धता जनाउँदै सरकारलाई पनि दबाब दिने बताए। उनले भने, “यो विपद्को घडीमा हामी सबै एकजुट भएर पीडितको सेवा गर्नुपर्छ। सरकारले पनि यो विषयलाई गम्भीरतापूर्वक लिनुपर्छ।”
प्रचण्डले दसैँ नजिकिँदै गर्दा पीडितहरूलाई नयाँ घर बनाएर बस्ने वातावरण बनाउन सरकारले तत्काल पहल गर्नुपर्ने बताए। उनले भने, “पीडितहरूलाई राहत मात्र होइन, पुनर्स्थापनामा पनि ध्यान दिनुपर्छ।”
