चितवन,२८असोज। पूर्व–पश्चिम राजमार्गअन्तर्गत चितवनको रत्ननगर नगरपालिका–३ शान्तिचोकमा हिजो साँझ भएको मोटरसाइकल र स्कुटर दुर्घटनामा परी एक जनाको मृत्यु भएको छ भने तीन जना घाइते भएका छन्।
प्राप्त जानकारीअनुसार, खैरहनीबाट टाँडीतर्फ आउँदै गरेको ना ४६ प ८२४८ नम्बरको मोटरसाइकल र विपरीत दिशाबाट आउँदै गरेको ना ५६ प ९१६९ नम्बरको स्कुटर एकापसमा ठक्कर खाएका थिए। दुर्घटनामा परी स्कुटर चालक खैरहनी नगरपालिका–१ बस्ने २१ वर्षीय दीपेश चौधरीको उपचारका क्रममा मृत्यु भएको छ। उनलाई उपचारका लागि भरतपुरस्थित मनकामना अस्पताल लगिएको थियो।
दुर्घटनामा परी स्कुटरमा पछाडि सवार खैरहनी नगरपालिका–१ बस्ने २४ वर्षीय अर्जुन चौधरी गम्भीर घाइते भएका छन्। उनको नाक र मुखमा चोट लागेको छ र उनको उपचार मनकामना अस्पतालमा भइरहेको छ।
यसैगरी, मोटरसाइकल चालक खैरहनी नगरपालिका–१ बस्ने २२ वर्षीय अनिस बस्नेत र पछाडि सवार सोही ठाउँका २२ वर्षीय सुजेक दराई पनि घाइते भएका छन्। उनीहरूको अवस्था मध्यम रहेको र पुरानो मेडिकल कलेज भरतपुरमा उपचार भइरहेको जिल्ला प्रशासन कार्यालय चितवनले जनाएको छ।
