भरतपुर,१ कार्तिक। चितवनमा स्क्रब टाइफसको संक्रमण फैलिँदै गएको छ। विभिन्न अस्पतालमा उपचारका लागि आएका बिरामीमध्ये ३८६ जनामा यो रोग पुष्टि भएको छ। साउनयता गरिएको २१४४ वटा परीक्षणमा यो तथ्यांक प्राप्त भएको हो।
जिल्ला जनस्वास्थ्य कार्यालयका अनुसार संक्रमितमध्ये १९६ जना चितवनका र १९० जना अन्य जिल्लाका छन्। यस अवधिमा एक जनाको मृत्यु भइसकेको छ।
भरतपुर सबैभन्दा बढी प्रभावित
जिल्लामा सबैभन्दा बढी भरतपुर महानगरपालिकाका बासिन्दा स्क्रब टाइफसबाट प्रभावित भएका छन्। यसबाहेक रत्ननगर, राप्ती, खैरहनी, कालिका, माडी र ईच्छाकामना गाउँपालिकामा पनि संक्रमण फैलिएको छ।
के हो स्क्रब टाइफस?
स्क्रब टाइफस ओरिएन्टा सुसुगामुसी नामक जीवाणुबाट हुने संक्रामक रोग हो। झाडीमा पाइने किर्ना (माइट्स)ले यो जीवाणु बोक्छन्। संक्रमित किर्नाले टोकेको मुसा वा अन्य जनावरलाई मानिसले छुँदा वा टोकिँदा रोग सर्छ।
लक्षण र रोकथाम
स्क्रब टाइफसका लक्षणमा उच्च ज्वरो, आँखा रातो हुनु, खोकी, वान्ता, पेट दुख्ने, पखाला, श्वास फेर्न गाह्रो हुनु, टाउको, जोर्नी र मांसपेशी दुख्नु, शरीरमा बिमिरा देखिनु र टोकेको ठाउँमा कालो दाग देखिनु पर्छ।
यस रोगबाट बच्न झाडीमा नजाने, लामो कपडा लगाउने र मुसा तथा अन्य संक्रमित जनावरबाट टाढा रहने उपाय अपनाउन चिकित्सकहरूको सुझाव छ।
