काठमाडौ,५ कार्तिक। नेकपा एमालेमा पार्टी भवन निर्माणको विषयलाई लिएर विवाद चर्किएको छ। पार्टीको निर्णयविरुद्ध उभिएको भन्दै तीन जना नेतालाई स्पष्टीकरण सोध्ने निर्णय भएको छ।
आइतबार बसेको एमाले सचिवालय बैठकले पूर्व उपाध्यक्ष भिम रावल, स्थायी कमिटी सदस्य विन्दा पाण्डे र केन्द्रीय सदस्य उषाकिरण तिम्सिनालाई स्पष्टीकरण सोध्ने निर्णय गरेको हो।
एमाले महासचिव शंकर पोखरेलले पार्टीको निर्णयविरुद्ध अभिव्यक्ति दिएकाले उनीहरूलाई स्पष्टीकरण सोधिएको जानकारी दिए। उनीहरूले व्यापारी मीनबहादुर गुरुङबाट जग्गा दान लिएर पार्टी भवन निर्माण गर्ने निर्णय गलत भएको भन्दै सार्वजनिक रूपमा असन्तुष्टि जनाएका थिए।
महासचिव पोखरेलले भने, “केन्द्रीय कार्यालयको भवन निर्माणको बहसमा पार्टी निर्णयको विरुद्धमा जाने नेताहरूलाई स्पष्टीकरण सोध्ने निर्णय भएको छ। पार्टीको नीतिसँग असहमत भइ विचार प्रकट गर्ने पूर्व उपाध्यक्ष भीम रावललाई पनि स्पष्टीकरण सोध्ने निर्णय छ। के कति कारणले त्यस्ता गतिविधि गर्नुभएको भन्ने सोधिएको छ।”
गत असोज २४ मा बसेको एमाले सचिवालय बैठकले व्यापारी मीनबहादुर गुरुङबाट १० रोपनी १४ आना जग्गा सहित एक अर्ब बराबरको केन्द्रीय कार्यालय भवन दानमा लिने निर्णय गरेको थियो। उक्त निर्णयप्रति पाण्डे र तिम्सिनाले सार्वजनिक रूपमा असन्तुष्टि जनाउँदै यो निर्णयले पार्टीको स्वाभिमानमा चोट पुगेको बताएका थिए।
स्थायी कमिटी सदस्य पाण्डेले भनेकी थिइन्, “पाँच लाख पार्टी सदस्यको स्वाभिमानी शिर झुकाउने र २८ लाख मतदाताको अपमान गर्ने कदम हो यो।”
केन्द्रीय सदस्य तिम्सिनाले व्यापारीले बनाइदिएको महलभन्दा आफ्नै पसिनाले सिञ्चित भवन प्यारो हुने बताएकी थिइन्। उनले निर्णय फिर्ता लिन अनुरोध गर्दै भनेकी थिइन्, “हामीलाई कुनै व्यापारीले बनाइदिएको ठूलो महलभन्दा मदननगरमा जति मिल्छ त्यति नै आफ्नो पसिनाले सञ्चिएको भवन प्यारो र गर्विलो हुनेछ।”
