काठमाडौं, ७ कात्तिक। नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले सरकार गठनको सय दिनभित्र भ्रष्टाचारीको संरक्षणमा मात्रै ध्यान दिएको आरोप लगाएका छन्। आज बिहान नेपाल बुद्धिजीवी संगठनका पदाधिकारीहरूसँगको भेटमा उनले सरकारको कामप्रति गम्भीर असन्तोष व्यक्त गरेका हुन्।
‘सरकारको सय दिन पूरा भइसक्यो। सरकार गठन हुँदा हामीले व्यक्त गरेका शंकाहरू सय दिनमै पुष्टि भएका छन्,’ प्रचण्डले भने, ‘यस अवधिमा न केवल विपक्षी दलहरू, तर नागरिक समाजका अगुवा र सत्तारूढ दलकै नेताहरूले पनि असन्तुष्टि जनाएका छन्। सरकारले गर्नुपर्ने काममा चुकेको र नगर्नुपर्ने काममा मात्रै केन्द्रित भएको छ भन्ने स्पष्ट देखिन्छ।’
प्रचण्डले विद्युत् प्राधिकरणका कार्यकारी निर्देशकलाई उद्योगहरूको बक्यौता उठाउन खोज्दा हटाउन प्रयास गर्नु, सामान्य प्राविधिक त्रुटिका आधारमा उपसभामुख हटाउन खोज्नु र प्रधानमन्त्रीको दलले विवादास्पद व्यवसायीबाट जग्गा दान लिएको घटनाले सरकार भ्रष्टाचारको पक्षमा रहेको प्रमाणित गरेको बताए।
सरकारलाई सही मार्गमा ल्याउन पाँच विपक्षी दलहरूले राष्ट्रपति समक्ष ज्ञापनपत्र बुझाइसकेको उल्लेख गर्दै प्रचण्डले सरकारका गतिविधिप्रति थप ध्यानाकर्षण गराउन राष्ट्रपतिलाई भेट्ने तयारी रहेको जानकारी दिए। साथै, सरकारको गलत कार्यशैलीविरुद्ध सडकमा संघर्ष गर्ने चेतावनी पनि उनले दिए।
उनका अनुसार, आगामी कात्तिक १० गते बागमती, विशेष र समन्वय प्रदेश समितिहरूको आयोजनामा काठमाडौंमा खबरदारी सभा आयोजना हुँदैछ। प्रचण्डले पार्टीको पक्षमा देशभर सकारात्मक माहोल बन्दै गएको बताउँदै बुद्धिजीवी संगठनहरूलाई पनि आफ्नो भूमिका थप प्रभावकारी बनाउने आग्रह गरे।
