एजेन्सी । बङ्गलादेशमा राष्ट्रपति मोहम्मद साहाबुद्दिनको राजीनामा माग गर्दै प्रदर्शनकारीहरूले राजधानी ढाकास्थित राष्ट्रपति भवन ‘बङ्गभवन’ कब्जा गरेका छन्।मङ्गलबार दिउँसो प्रधानमन्त्री शेख हसिनालाई हटाउन ‘एन्टी–डिस्क्रिमिनेशन स्टुडेन्ट मुभमेन्ट’ समूहले ढाकाको केन्द्रीय शहीद मिनारमा र्याली गर्दै पाँच बुँदे मागसहित राष्ट्रपतिको राजीनामा घोषणा गरेका थिए।
मध्यराति प्रदर्शनकारीहरू बङ्गभवनतर्फ अघि बढ्दा सेनाले ब्यारिकेड लगाएर रोक्ने प्रयास गरेको थियो। तर प्रदर्शनकारीहरू भवनबाहिर भेला भएर साहाबुद्दिनको राजीनामाको माग गर्दै नारा लगाउन थाले। एक प्रदर्शनकारीले भने, “राष्ट्रपति हसिनाको अधिनायकवादी सरकारका सहयोगी हुन्, उनले तत्काल राजीनामा दिनुपर्छ।”
मोहम्मद साहाबुद्दिन बङ्गलादेशका १६औँ राष्ट्रपति हुन् र सन् २०२३ मा अवामी लिगको तर्फबाट निर्विरोध निर्वाचित भएका थिए।
विद्यार्थी आन्दोलनले सन् १९७२ मा लेखिएको संविधान खारेज गरी २०२४ मा नयाँ संविधान बनाउने माग राखेको छ। साथै, अवामी लिगको विद्यार्थी सङ्गठनमाथि प्रतिबन्ध लगाउन पनि उनीहरूले माग गरेका छन्।
प्रदर्शनकारीहरूले सन् २०१८ र २०२४ मा भएको चुनावलाई अवैध ठहर गर्दै ती चुनावमा विजयी सांसदहरूलाई अयोग्य घोषित गर्नुपर्ने बताएका छन्। उनीहरूले जुलाई–अगस्टको विद्रोहलाई स्मरण गर्दै गणतन्त्र घोषणा गर्नसमेत आह्वान गरेका छन्।
सरकारी जागिरका लागि आरक्षण प्रणाली अन्त्यको माग गर्दै जुलाईमा सुरु भएको विद्यार्थीहरूको विरोध आन्दोलन विस्तार हुँदै सरकारविरुद्धको आन्दोलनमा परिणत भएको हो।
प्रधानमन्त्री शेख हसिनाले ५ अगस्टमा राजीनामा दिएपछि बङ्गलादेशमा अन्तरिम सरकार गठन भएको थियो। हाल नोबेल पुरस्कार विजेता मुहम्मद युनुसको नेतृत्वमा अन्तरिम सरकार सञ्चालन भइरहेको छ।युगान्तर डटकमबाट
