काठमाडौं, २७ कार्तिक। नेकपा (माओवादी केन्द्र) ले वर्तमान सरकार भ्रष्टाचारलाई संरक्षण गरिरहेको आरोप लगाउँदै यो सरकार आफैं ढल्ने दाबी गरेको छ।
सोमबार पार्टी अध्यक्ष प्रचण्ड निवास खुमलटारमा बसेको पार्टीको पदाधिकारी बैठकपछि सञ्चारकर्मीहरूसँग कुरा गर्दै पार्टी प्रवक्ता अग्निप्रसाद सापकोटाले यस्तो दाबी गरेका हुन्।
सापकोटाले देशमा राम्रा काम गरिरहेका कर्मचारीहरूलाई हटाउने खेल भइरहेको भन्दै यसलाई गम्भीर चिन्ताको विषय बनाएका छन्। उनले देशमा असाधारण परिस्थिति उत्पन्न भएको बताउँदै यस्तो परिस्थिति सामना गर्न सबै राजनीतिक दलहरूबीच एकता र समझदारी हुन जरुरी रहेको बताए।
प्रवक्ता सापकोटाले सरकार राजनीतिक दलहरूलाई फुटाउने षड्यन्त्रमा लागिरहेको आरोप लगाउँदै संविधान संशोधन अग्रगमन र परिवर्तनको पक्षमा हुनुपर्ने बताए। उनले राष्ट्रियताको सवाल झनझन पेचिलो बन्दै गएको र लोकतन्त्रका मूल्य, मान्यता र आदर्श कुल्चिने प्रयास भइरहेको भन्दै चिन्ता व्यक्त गरे।
सापकोटाले जनतालाई सही ढंगले परिवर्तन र अग्रगमनका पक्षमा दिशानिर्देश गर्न जरुरी रहेको बताउँदै माओवादी केन्द्र यस दिशामा प्रतिबद्ध रहेको बताए।
