रामेछाप,पुस ७ गते।रामेछापको मन्थली र रामेछाप नगरपालिकाका विभिन्न वडामा लगाइएका जुनारका बगैँचाहरूमा यस वर्ष उत्पादनमा उल्लेख्य वृद्धि भएको छ। विशेषगरी ओख्रेनी, सुकाजोर, सालु र फुलासी क्षेत्रका किसानहरू जुनार बिक्रीबाट उत्साहित छन्।
गत वर्षको तुलनामा यस वर्ष जुनार उत्पादनमा करिब ५० प्रतिशतको वृद्धि भएको कृषि प्राविधिकहरूले बताएका छन्। अनुकूल मौसम, किसानको मेहनत र प्राविधिक ज्ञानको प्रयोगले यो वृद्धि सम्भव भएको हो।
प्रधानमन्त्री कृषि आधुनिकीकरण परियोजनाका अनुसार यस वर्ष मन्थली र रामेछाप नगरपालिकाबाट मात्रै करिब २२ करोड ७५ लाख रुपैयाँ बराबरको जुनार बिक्री हुने अनुमान गरिएको छ। गत वर्ष यो रकम १९ करोड रुपैयाँ मात्र थियो।
रामेछाप नगरपालिका-६ ओख्रेनीका किसान हिमाल तामाङले आफ्नो बगैँचामा गत वर्षको तुलनामा ५० प्रतिशत बढी जुनार उत्पादन भएको बताए। उनले यस वर्ष तीन लाख ५० हजार रुपैयाँ बराबरको जुनार बिक्री गर्ने लक्ष्य राखेका छन्।
ओख्रेनीकै दिलमाया तामाङ र शेरबहादुर तामाङले पनि आफ्नो उत्पादनमा क्रमशः ४० प्रतिशत र ३५ प्रतिशतको वृद्धि भएको जानकारी दिए। यस क्षेत्रका अन्य किसानहरू युगराज पाख्रिन, डेगराज तामाङलगायतले पनि राम्रो उत्पादन लिएको बताएका छन्।
जुनार किसानहरूले जुनारसँगै अन्य बाली जस्तै भटमास, तोरी, लसुन, प्याज आदि पनि लगाएर दोहोरो फाइदा लिने गरेका छन्। यसले गर्दा किसानहरूको आर्थिक अवस्थामा सुधार आएको छ।
रामेछाप नगरपालिकाका बाली संरक्षण अधिकृत कृष्ण भुजेलले जुनार उत्पादनमा भएको वृद्धिलाई सकारात्मक रूपमा लिएका छन्। उनले किसानहरूलाई थप प्रोत्साहन गर्न र उत्पादकत्व बढाउनका लागि आवश्यक सहयोग प्रदान गरिने बताए।
