काठमाडौं, वैशाख ११ गते। सत्तारुढ दल नेकपा (एमाले) र नेपाली कांग्रेसका शीर्ष नेताहरू सत्ता साझेदारीको विषयमा सार्वजनिक टिप्पणी गर्दै आमनेसामने आएका छन्। विहीबार प्रधानमन्त्री तथा एमाले अध्यक्ष केपी शर्मा ओलीदेखि कांग्रेस महामन्त्री गगन थापासम्मले खुलेर सत्ता साझेदारीको विषयमा धारणा राखेपछि मुलुकको राजनीतिक तापक्रम फेरि चुलिएको देखिएको छ।
प्रधानमन्त्री ओलीले सत्ता जोगाउनेभन्दा पनि निर्वाचनमा केन्द्रित हुने धारणा राख्दै भने, “एमाले जहिल्यै पनि चुनाव हेर्छ। हामीले ‘मिसन ०८४’ घोषणा गरिसकेका छौं। सरकार जोगाउनको लागि होहल्ला गर्नु हाम्रो काम होइन।”
यता कांग्रेस महामन्त्री गगन थापाले लोकतन्त्र दिवसका अवसरमा आयोजित कार्यक्रममा बोल्दै, “आधारभूत सिद्धान्तमा सम्झौता गर्न सकिँदैन। पर्यो भने कांग्रेस यस्ता सरकारबाट बाहिरिन्छ,” भन्दै सरकारमा बस्ने सवाललाई सामान्य मान्यता दिन नसकिने धारणा राखे।
यसैबीच, नेपाली कांग्रेसको भ्रातृ संस्था नेपाल विद्यार्थी संघ (नेविसंघ)ले प्रधानमन्त्री ओलीविरुद्ध प्रदर्शनसमेत गरेको छ। बालुवाटारस्थित प्रधानमन्त्री निवास अगाडि गरिएको प्रदर्शनमा सहभागी ८ जना नेविसंघ नेताहरूलाई प्रहरीले नियन्त्रणमा लिएको छ। उनीहरूले शिक्षामन्त्री विद्या भट्टराईमाथि गरिएको असहयोग, शिक्षकहरूको मागप्रति देखाइएको उदासिनता र त्रिभुवन विश्वविद्यालयका उपकुलपति नियुक्तिमा गरिएको हस्तक्षेपको विरोध गरेका हुन्।
यसै दिन कांग्रेस प्रवक्ता डा. प्रकाशशरण महतले नेपाल राष्ट्र बैंकको गभर्नर नियुक्तिमा गरिएको ढिलाइप्रति आपत्ति जनाउँदै भने, “अर्थतन्त्रलाई प्राथमिकतामा राखेर काम गर्ने व्यक्तिलाई तुरुन्त गभर्नर नियुक्त गर्नुपर्छ।”
राजनीतिक खिचातानीको यो माहोलबीच कांग्रेस सभापति शेरबहादुर देउवाले थाइल्यान्ड प्रस्थानपूर्व माओवादी केन्द्र अध्यक्ष पुष्पकमल दाहाल ‘प्रचण्ड’लाई फोन गरेर शुभकामना सन्देश आदान–प्रदान गरेका छन्। माओवादी संसदीय दलको बैठकमा प्रचण्डले देउवाले फर्किएपछि भेट्ने कुरासमेत भएको जानकारी दिएका छन्।
वर्तमान सरकारभित्रको सन्तुलन र विश्वास संकटको संकेत दिने यी गतिविधिले आगामी दिनमा सत्ता समीकरण फेरबदलको सम्भावना खुला राखेको देखिन्छ।
