काठमाडौं, १० साउन। नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले अहिलेको प्रमुख चुनौती दलाल पुँजीवाद र नोकरशाही पुँजीवाद रहेको बताएका छन्।
शनिबार काठमाडौंमा आयोजित एक कार्यक्रममा सम्बोधन गर्दै अध्यक्ष प्रचण्डले नेपालमा अब सामन्ती निरङ्कुशतन्त्र र राजतन्त्र मुख्य दुस्मन नरहेको स्पष्ट पारे। उनले भने, “यदाकदा ती तन्त्रहरू उठ्न खोजे पनि अब ती मुख्य चुनौती बनेका छैनन्।”
उनका अनुसार, अहिले दलाल पुँजीपतिको समूह, बिचौलिया, र केही मुठीभर व्यक्तिहरूले राज्यलाई विध्वंसतर्फ डोर्याइरहेका छन्। “नेपालको अर्थतन्त्र र विकास प्रक्रिया केही थोरै शक्तिकेन्द्रमा सीमित भएको छ। समृद्धिको यात्रामा नोकरशाही पुँजीवाद नै मुख्य बाधक बनेको छ,” उनले भने।
अध्यक्ष प्रचण्डले हालको अवस्था दयनीय रहेको टिप्पणी गर्दै संघीय निजामती विधेयकमाथि भएको चलखेल र छेडछाडले सम्पूर्ण सांसदहरू अपमानित हुने अवस्था सिर्जना भएको आरोपसमेत लगाए।
कार्यक्रममा उनले भ्रष्टाचार, दलाल पुँजीवाद र नोकरशाही पुँजीवादविरुद्ध सबै राजनीतिक शक्तिहरू एक हुनुपर्ने आवश्यकता औंल्याए। “अब हामी सबैले संकल्प गर्नुपर्छ दलाल पुँजीवाद र नोकरशाही पुँजीवादविरुद्ध साझा मोर्चा बनाउने,” अध्यक्ष प्रचण्डको भनाइ थियो।
