पोखरा, चिप्लेढुंगा । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले देश गम्भीर राष्ट्रिय संकटको दोभानमा पुगेको चेतावनी दिँदै सम्पूर्ण वामपन्थी, प्रगतिशील र देशभक्त शक्ति एकताबद्ध हुनुपर्नेमा जोड दिनुभएको छ। पोखराको चिप्लेढुंगामा आयोजित एकता सन्देश सभालाई सम्बोधन गर्दै उहाँले अहिले राष्ट्रिय स्वाधिनता र सुरक्षा प्रणाली दुरुस्त नभएको दाबी गर्नुभयो।
“दुई तिहाइले के दियो ?” — प्रचण्डको तीखा प्रश्न
उहाँले एमाले र कांग्रेसको दुई–दुई तिहाइ बहुमतले देशलाई कुनै लाभ नपुगेको आरोप लगाउँदै भन्नुभयो,
“कांग्रेस–एमालेकै कारण राष्ट्र संकटमा फसेको हो। भ्रष्टाचारविरुद्ध लड्न खोज्दा हामीलाई सरकारबाट हटाइयो। लड्न नदिने शक्ति त्यही दुई तिहाइमै थियो।”
कम्युनिस्ट एकता ‘चुनाव जित्ने लक्ष्य’भन्दा पर: प्रचण्ड
‘एकता अभियान’ चुनाव जित्ने स्वार्थकै लागि सुरु भएको होइन, राष्ट्रको रक्षा, स्वाधिनता संरक्षण र समृद्धिको आधार निर्माण नै मुख्य उद्देश्य भएको प्रचण्डले स्पष्ट पार्नुभयो।
उहाँले भन्नुभयो,
“चुनाव त जित्छौँ, तर राष्ट्र बचाउन जनताको राष्ट्रिय एकता अनिवार्य छ। एकता बिना देश सुरक्षित हुँदैन।”
फागुन २१ को निर्वाचन अवरोध नगर
आगामी फागुन २१ गते नै तोकिएको निर्वाचन कुनै बहानामा पनि सार्न नहुने प्रचण्डको भनाइ थियो।
उहाँले सरकारप्रति इङ्गित गर्दै थप्नुभयो,
“जनाधार भएका शक्तिलाई बेवास्ता गरेर चुनावी वातावरण बन्दैन। यो सरकार मैले र माधव नेपालले रातभर सहमति गरेर बनाएका हौँ।”
सरकार विभिन्न पक्षसँग छलफलमा रहेको र चुनाव कुनै न कुनै रूपमै सुनिश्चित हुने विश्वास पनि उहाँले व्यक्त गर्नुभयो।
‘जनता सचेत नभए अर्को ठूलो संकट अवश्यम्भावी’
राष्ट्रको वर्तमान राजनीतिक मोड अत्यन्त संवेदनशील बनेको उल्लेख गर्दै प्रचण्डले जनताको चेतना, संगठन र राष्ट्रियताको भावनामा कमजोर देखिए आगामी दिनमा थप ठूलो संकट पैदा हुन सक्ने चेतावनी दिनुभयो।
प्रचण्डका मुद्दाले राजनीतिक तापमान झन् बढ्यो
सभामा उपस्थित कार्यकर्ताहरूले प्रचण्डले उठाएका मुद्दा राष्ट्रिय स्वाधिनता, कम्युनिस्ट एकता र समयमै निर्वाचनलाई देश फेरि गम्भीर राजनीतिक बहसतिर धकेलिने संकेतका रूपमा व्याख्या गरेका छन्।
