काठमाडौं, ८ असोज। शिक्षा विज्ञान तथा प्रविधि मन्त्री विद्या भट्टराईले शिक्षक सेवा आयोगको पाठ्यक्रम परिवर्तन गरिने बताएकी छन् । पाठ्यक्रम परिवर्तन गर्ने सवालमा आयोगका कर्मचारीहरूसँग छलफल भईसकेको बताउँदै यही आर्थिक वर्षमा पाठ्यक्रम परिवर्तन गरिने बताएकी हुन् ।
पत्रकारको प्रश्नमा उनले ‘भनिन् शिक्षक सेवा आयोगको पाठ्यक्रम परिवर्तन हुन्छ । कर्मचारीहरूसँग बसेर यसबारे छलफल पनि भईसकेको छ । यही आर्थिक वर्षमा परिवर्तन गर्ने तयारीमा छौँ । अहिले उहाँहरू नतिजा निकाल्ने काममा व्यस्त हुनुहुन्छ, त्यसपछि परिवर्तनको प्रक्रियालाई छलफल गरेर अगाडी बढाउनु हुन्छ ।’आयोगले विभिन्न चरणमा सरोकारवाला पक्षसँग सुझाब लिएर पाठ्यक्रमको परिवर्तनको प्रक्रिया अगाडी बढाउने स्रोतले जनाएको छ । पाठ्यक्रम शिक्षा सम्बन्धी पेडागोजीमा केन्द्रीत रहेर परिवर्तन गर्ने तयारी समेत शिक्षक सेवा आयोगले गरेको र आन्तरिक छलफल भइरहेको स्रोतको भनाई छ ।
आयोगले आधारभूत तह र माध्यमिक तहको पाठ्यक्रम २०७६ सालमा निर्माण गरेको थियो भने अध्ययन अनुमति पत्र र बढुवाको पाठ्यक्रम २०७८ मा निर्माण गरेको थियो ।
