काठमाडौं,१२ असोज। निरन्तर वर्षाका कारण सप्तकोशी नदीमा पानीको सतह खतराको तहमा पुगेपछि कोशी ब्यारेजका सबै ५६ वटा ढोका खोलिएका छन्।सुनसरी जिल्ला प्रशासन कार्यालयका अनुसार आज बिहान ७ बजे नदीमा प्रतिसेकेन्ड ३ लाख ८१ हजार आठ सय ४० क्युसेक पानी बगिरहेको थियो भने बिहान ८ बजे यो बढेर ४ लाख १८ हजार दुई सय ८५ पुगेको छ। नदीको जलस्तर निरन्तर बढिरहेकाले कोशी ब्यारेजमा जोखिमको संकेत देखिएको छ।
सप्तकोशी जलमापन केन्द्रका अनुसार पानीको सतह खतराको तह नाघिसकेको छ। यसले उदयपुर र सुनसरीका तटीय क्षेत्रमा बाढीको जोखिम बढाएको छ।
सुनसरीका प्रमुख जिल्ला अधिकारी रामचन्द्र तिवारीले तटीय क्षेत्रका बासिन्दालाई सतर्क रहन र सुरक्षित स्थानमा जान आग्रह गरेका छन्। प्रशासनले सम्भावित क्षति न्यूनीकरण गर्न आवश्यक तयारी गरिरहेको जनाएको छ।
