काठमाडौं,१२ असोज। तीन दिनदेखिको अविरल वर्षापछि आएको बाढी, पहिरो, र डुबानले नेपालमा ठूलो जनधनको क्षति पुर्याएको छ। हालसम्म ६६ जनाको मृत्यु भएको छ भने ७९ जना बेपत्ता छन्। सशस्त्र प्रहरी बल नेपालका अनुसार साँझ ५ बजेसम्म देशभर ३५ जना घाइते भएका छन्।
सशस्त्र प्रहरीका प्रवक्ता कुमार न्यौपानेले उपत्यकामा मात्र ३४ जनाको मृत्यु भएको जानकारी दिए। काठमाडौँमा ११, भक्तपुरमा ५, र ललितपुरमा १८ जनाको ज्यान गएको छ।
उपत्यका बाहिर पाँचथरमा ५, धनकुटामा २, सोलुखुम्बुमा २, सुनसरीमा १, काभ्रेमा १४, धादिङमा १, सिन्धुपाल्चोकमा ४, र दोलखामा ३ जनाको मृत्यु भएको छ।
७९ जना बेपत्ता भएको र २ हजारभन्दा बढीको उद्धार गरिएको छ। दुई सयभन्दा बढी घरहरूमा क्षति पुगेको छ। नेपाल प्रहरीका सहप्रवक्ता विश्व अधिकारीका अनुसार उद्धारकार्यमा १० हजारभन्दा बढी सुरक्षाकर्मी परिचालन गरिएको छ।
