सिन्धुली,१५ असोज। सिन्धुलीको सुनकोशी गाउँपालिका-१, नेपालथोकका सुन्दर फाँटहरू पाकेको धानले पहेँलिएका थिए। लहलह झुलेको सुनौलो धान भित्र्याउन किसानहरूले खेताला खोजिसकेका थिए।
तर, गत शुक्रबार र शनिबार रोशी खोलामा आएको बाढीले सबै कुरा बदलिदियो। बाढीले धान फाँटमा प्रवेश गर्दा माटो र गेग्रानले खेतलाई बगरमा परिणत गरिदियो। दसैँअघि भित्र्याउन तयार गरिएको धान, अब बगर बनेपछि किसानहरू निराश छन्।
२२ रोपनी जमिन भाडामा लिएर धान खेती गरेका किसान केशवसिंह श्रेष्ठ बाढीले धान सखाप पारेर भोक, निद्रा हराएको गुनासो गर्छन्। उनले जेठ २९ गते ८० हजार रुपैयाँ खर्च गरेर रोपेको धान पाक्दै गर्दा बाढीले सबै बर्बाद पारिदियो। उनले भने, “हाम्रो सात जनाको परिवार छ, अब कसरी पाल्ने? चार दिनदेखि भोक, निद्रा छैन।”
यसैगरी, सुनकोशी-१ गोइरीकी किसान कृष्णमाया तोलङ्गेले तीन रोपनीमा लगाएको धान पूर्ण रूपमा नष्ट भएको बताएकी छन्। सबै मेहनत र खर्च बाढीले बगाउँदा उनी अत्यन्त दुःखी छिन्।
सुनकोशी-१ गजुलीदहका किसान गणेश श्रेष्ठ पनि पाँच रोपनीमा लगाएको धान बाढीले बगरमा परिणत गरेको देख्दा भक्कानिएका छन्। उनका पाँचजनाको परिवारको मुख्य आयस्रोत कृषि हो, तर बाढीपछि उनको चिन्ता अझै बढेको छ।
सिन्धुलीका मात्र नभएर आसपासका क्षेत्रका धान खेतहरू बाढीले बगर, सोतर, वा बालुवा र मुढाले पुरिएका छन्। सुनकोशी गाउँपालिकाभित्र मात्र तीन सय बिघामा लगाइएको धान बाली बाढीले नष्ट गरेको उपाध्यक्ष कपिलकुमार कोइरालाले बताएका छन्।
गोलञ्जोर गाउँपालिकामा भित्र्याउनै लागेको ३० बिघाको धान बाली नष्ट भएको उपाध्यक्ष ज्वालाप्रसाद न्यौपानेले आकलन गरेका छन्। बाढीले गोलञ्जोरका धेरै फाँटहरू, जस्तै बेसीँफाँट, बलेनी, कुखुरेटार, मुर्गी, र च्याखुटारबेँसीका धान बाली नष्ट गरेको छ।
हरिहरपुरगढी गाउँपालिकामा वाग्मती नदीले बस्तीपुर, कुर्ले, भिसापानी, र श्रीपुरका फाँटहरूमा क्षति पुर्याएको छ। यहाँका खेतीयोग्य जमिन नदीले कटान गर्दा चार सय ६५ हेक्टर जमिन र धान बालीमा क्षति भएको पालिका अध्यक्ष बज्रध्वज वाइबाले बताएका छन्।
जिल्लाका नौ पालिकाका खेतीयोग्य जमिन र धान बालीमा ठूलो क्षति भएको कृषि विकास कार्यालयकी अधिकृत उमादेवी श्रेष्ठले बताइन्। तीन दिनको अविरल वर्षा र बाढीपहिरोले सबै पालिकाका धान बालीलाई असर गरेको छ। यकिन क्षतिको विवरण सङ्कलन भइरहेको छ, जसको आधारमा राहत र क्षतिपूर्तिका लागि समन्वय गरिनेछ।
