काठमाडौं, १६ असोज। इजरायलले पुष्टि गरे अनुसार, मंगलबार राति १० बजे इरानले इजरायलमा मिसाइल प्रहार गरेको छ। यसअघि, अमेरिकाले इरान इजरायलमा आक्रमणको तयारी गरिरहेको खुलासा गरेको थियो। अमेरिकाले इरानले इजरायलमा हमला गरेमा त्यसको परिणाम गम्भीर हुने चेतावनी दिएको थियो।
अमेरिकी पत्रिका न्यूयोर्क टाइम्सका अनुसार, इजरायलका तीन एयरबेस र तेल अवीवमा रहेको एक इंटेलिजेन्स मुख्यालयलाई लक्षित गरी आक्रमण गरिएको छ। ती स्थानहरू इजरायलले खाली गरिसकेको थियो।
यो घटनापछि इजरायल र इरानबीच युद्ध सुरु हुने आशंका थपिएको छ। यसअघि, गत अप्रिलमा पनि इरानले इजरायलमाथि ३०० मिसाइल र ड्रोन प्रहार गरेको थियो, जसमा ब्यालेस्टिक मिसाइल इरानबाट इजरायल पुग्न १२ मिनेट लागेको थियो।
आक्रमण सुरु भएलगत्तै इजरायली सुरक्षा निकाय आईडीएफले नागरिकहरूलाई सतर्क रहन र घरभित्रको सुरक्षालाई पालन गर्न निर्देशन दिएको छ। साइरन बज्नासाथ सुरक्षित स्थानमा जान र अर्को सूचना नआएसम्म बाहिर ननिस्कन आग्रह गरेको छ।
यसअघि, रूसी समाचार माध्यम आरटीले तेल अवीवमा गोलीकाण्ड हुँदा ३ जनाको मृत्यु र १० भन्दा बढी घाइते भएको जनाएको थियो। घाइतेमध्ये ४ जनाको अवस्था गम्भीर रहेको बताइएको छ।
इजरायलले सोमबारदेखि मंगलबारसम्म जमिनबाट आक्रमण सुरु गरेको थियो, यद्यपि उसले सीमा पार गरेको विषयमा विभिन्न सञ्चारमाध्यमहरूमा फरक-फरक विवरण सार्वजनिक भएका छन्।
