काठमाडौं, २२ कार्तिक। नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले छठ पर्वको अवसरमा नेपाली जनतालाई शुभकामना व्यक्त गर्नुभएको छ ।
एक शुभकामना सन्देश जारी गर्दै अध्यक्ष प्रचण्डले छठ पर्वले प्रकृति र मानव जीवनबीचको सम्बन्धलाई जीवन्त बनाउन महत्वपूर्ण भूमिका खेलेको बताउनुभएको छ । उहाँले यस पर्वले नेपालको विविधतालाई एकताबद्ध बनाउँदै राष्ट्रलाई सुशासन, सामाजिक न्याय र आर्थिक समृद्धिको बाटोमा अघि बढ्न प्रेरणा दिने विश्वास व्यक्त गर्नुभएको छ ।
प्रचण्डले भन्नुभएको छ, “मानव जीवन कृषि युगमा प्रवेश गरेपछि उत्पादित कृषिजन्य उपज र परिकारहरूको खुसीयाली एवं कृषि युगको निरन्तरताको प्रतीकका रूपमा सूर्यको आराधना गरी छठ पर्वको परम्परा सुरुवात भएको मानिन्छ । छठ पर्व प्रकृति र मानव जीवनबीच जीवन्त व्यवहारिक सम्बन्ध स्थापित गर्ने पर्वका रूपमा समेत स्थापित छ । यस पर्वले प्रकृति र मानवबीचको सम्बन्ध जीवन्त तुल्याउनका साथै जीवनोपयोगी प्राकृतिक वस्तुहरूको सम्मान एवं संरक्षण, उत्पादन एवं श्रम संस्कृतिको विकासका निम्तिसमेत महत्वपूर्ण भूमिका खेल्दछ । नेपालका विविध संस्कृति र पर्वहरु क्रमशः सम्पूर्ण नेपालीका साझा संस्कृति र परम्परा बन्दै गएका छन् । छठ पर्व पनि सम्पूर्ण नेपालीहरुकै आम पर्वको रुपमा मनाउन थालिएको छ ।”
अध्यक्ष प्रचण्डले छठ पर्वले चुनौतीहरूलाई अवसरमा बदल्न, व्यक्तिगत एवं सामाजिक जीवनमा आशाको रक्तसञ्चार भर्न, राष्ट्रलाई एकताबद्ध तुल्याउँदै सुशासन, सामाजिक न्याय र आर्थिक समृद्धिको बाटोमा अघि बढ्न हामी सबैलाई प्रेरणा मिल्ने विश्वास व्यक्त गर्नुभएको छ ।
