काठमाडौं,१० साउन। नेकपा (एमाले) निकट युवा संगठन राष्ट्रिय युवा संघ नेपालले पूर्वराष्ट्रपति विद्यादेवी भण्डारीको पक्षमा उभिएका कारण लुम्बिनी प्रदेश अध्यक्ष सुरज खरेललाई कडा कारबाही गरेको छ। संघको साउन ९ गते बसेको पदाधिकारी बैठकले खरेललाई एक वर्षका लागि संगठनबाट निलम्बन गर्ने निर्णय गरेको हो।
खरेलले हालै पार्टी अध्यक्ष केपी शर्मा ओलीलाई “अब मार्ग प्रशस्त गर्नुपर्ने समय आएको” भन्दै सामाजिक सञ्जालमा लेखेका थिए, जुन अध्यक्षविरोधी र अनुशासनविहीन ठहरिएको छ। यही अभिव्यक्तिले उनलाई पदबाट हटाउने कारक बनेको हो।
राष्ट्रिय युवा संघ नेपालका महासचिव रमेश चौलागाईद्वारा हस्ताक्षरित कारबाही पत्रमा खरेलमाथि गम्भीर आरोप लगाइएको छ। पत्रअनुसार संघको १०औं राष्ट्रिय महाधिवेशनको सन्दर्भमा खरेलले केन्द्रको निर्देशनको अवज्ञा गर्दै प्रदेश सचिवालयको बैठक आह्वान गरेका थिए। उनले संगठनको नाममा स्वेच्छाचारी, अराजक र गैरजिम्मेवार व्यवहार देखाएको पनि उल्लेख गरिएको छ।
खरेलमाथि संघको विधान २०४७ को धारा ४१ तथा ४२ (क) र (ख) अनुसार कारबाही गरिएको हो। उनी अब एक वर्षसम्म कुनै पनि संगठनात्मक जिम्मेवारीमा रहने छैनन्।
खरेल रुपन्देहीको देवदह नगरपालिकाका प्रमुख (मेयर) ध्रुव खरेलका छोरा हुन्। पार्टीभित्र पूर्वराष्ट्रपति भण्डारीलाई खुलेर समर्थन गर्नेहरूको संख्या बढ्दै जाँदा शीर्ष नेतृत्वको असहजता बढेको स्पष्ट देखिन थालेको छ। ओली नेतृत्वप्रति सार्वजनिक रूपमा असहमति जनाउनेहरूलाई यसरी संगठनबाट एकपछि अर्को गर्दै कारबाहीमा ल्याउनु नेतृवको असहिष्णुताको प्रतिबिम्बका रूपमा हेरिएको छ।
यो घटनाले एमालेभित्र आन्तरिक द्वन्द्व अझ चर्किएको संकेत गरेको छ। ‘ओली–भण्डारी सत्ता संघर्ष’को सन्दर्भमा सुरज खरेलमाथिको कारबाहीले युवा तहमै विद्रोहको संकेत देखिएको विश्लेषण राजनीतिक वृत्तमा हुन थालेको छ।
