काठमाडौं। नेकपा (माओवादी केन्द्र), नेकपा (एकीकृत समाजवादी) सहित देशभरका एक दर्जनभन्दा बढी वामपन्थी धारका समूहहरू एकीकरणको दिशामा अगाडि बढिरहेका छन्। सबै समूहहरूलाई समेटेर नेपाली कम्युनिष्ट पार्टी निर्माण गर्ने प्रक्रिया तीव्र गतिमा अघि बढेको प्रचण्ड सचिवालयले जनाएको छ।
यसैबीच सरकारले आगामी फागुन २१ गतेका लागि आम निर्वाचन घोषणा गरेपछि निर्वाचन आयोगले दल दर्ता तथा प्रमाणपत्र प्राप्तिका लागि यही कात्तिक ३० गतेभित्र आवश्यक विवरण बुझाइसक्नुपर्ने सूचना सार्वजनिक गरेको थियो। आयोगमा बुझाइएका केही विवरणबारे सार्वजनिक रूपमा भ्रम फैलिएको भन्दै संयोजक पुष्पकमल दाहाल ‘प्रचण्ड’को सचिवालयले स्पष्टिकरण जारी गरेको छ।
सचिवालयका अनुसार आयोगमा बुझाइएको सूची कुनै नयाँ संरचना नभई, एकीकरणपूर्वकै स्थायी समिति सदस्यहरूको सूची निर्वाचन व्यवस्थापकीय आवश्यकताका कारण पेस गरिएको हो। कानुनअनुसार एक तिहाइ महिला समावेश गर्नु पर्ने संवैधानिक प्रावधान पूरा गर्न तत्काल उपलब्ध भई हस्ताक्षर गरेका १३ जना महिला केन्द्रीय सदस्यहरूको नाम सूचीमा थपिएको स्पष्टीकरण पनि दिइएको छ।
सचिवालयले यसलाई केही समूहले प्रचार गरिरहेको जस्तो अलग र स्थायी संरचना नभई एकीकृत पार्टी निर्माणका प्रक्रियागत आवश्यकताअन्तर्गत गरिएको अस्थायी व्यवस्था मात्रै भएको बताएको छ। पार्टी संयोजक र सह–संयोजक बाहेकका सबै पद तथा समितिहरू आपसी सहमतिका आधारमा गठन हुने र त्यो प्रक्रिया अहिले पनि निरन्तर जारी रहेको उल्लेख गरिएको छ।
प्रचण्ड सचिवालयले जारी गरिएको सूचनामा भनिए
को छ-“निर्वाचन आयोगमा पेश गरिएको विवरणप्रति कुनै भ्रम नपरऔं। एकीकरण अभियान दृढतापूर्वक अगाडि बढिरहेको छ। बाँकी सबै संरचना पनि सहमतिका आधारमै पूर्ण रूपमा टुंगो लाग्नेछ।”
नाताले प्रचण्डकी बुहारी बिना मगरसम्बन्धी चर्चामा पनि सचिवालयले अनावश्यक भ्रम सिर्जना नगर्न आग्रह गर्दै सबै नेता कार्यकर्तालाई एकताबद्ध भई एकीकृत पार्टी निर्माण प्रक्रियालाई सफल पार्न आह्वान गरेको छ।
