धनगढी । नेपाली कम्युनिष्ट पार्टी (नेकपा) आज (शुक्रबार) धनगढीमा शक्ति–प्रदर्शन गर्दै एकता सन्देश सभा आयोजना गर्दैछ। पार्टी गठनपछि राजधानी बाहिर पहिलोपटक आयोजना हुन लागिरहेको यो प्रदेशस्तरीय सभा नेकपाका लागि संगठित उपस्थितिको महत्वपूर्ण परीक्षा मानिएको छ।
धनगढी चौराह र क्याम्पस चोकबाट जुलुस निस्किएर दिउँसो १२:३० बजे धनगढी रंगशालामा विशाल आमसभामा परिणत हुनेछ। सुदूरपश्चिम भरिका कार्यकर्ताले सहभागिता जनाउने तयारीसहित स्थानीय वातावरण राजनीतिक जोशमा रन्झिएको छ।
सभालाई नेकपाका संयोजक पुष्पकमल दाहाल ‘प्रचण्ड’, सह–संयोजक माधवकुमार नेपाल, नेता भीम रावल लगायत प्रमुख नेताहरूले सम्बोधन गर्नेछन्। वामदेव गौतम, झलनाथ खनाल लगायत शीर्ष नेताहरूको उपस्थिति पनि रहने बताइएको छ।
सह–संयोजक माधवकुमार नेपालले धनगढीमा २० हजारभन्दा बढी कार्यकर्ता उतार्ने दाबी गर्दै यो सभाले नेकपाको संगठनात्मक शक्ति देशभर सन्देश प्रवाह गर्ने बताए।
नेकपाले प्रदेश–प्रदेशमा निरन्तर सभाहरू गर्दै संगठनात्मक एकता र जनसंपर्क विस्तारलाई प्राथमिकता दिएको छ। यसैक्रममा पार्टीले आगामी कार्यक्रमहरू पनि तय गरेको छः
मंसिर १३ – देउखुरी (लुम्बिनी)
मंसिर १४ – पोखरा (गण्डकी)
मंसिर १५ – विराटनगर (कोशी)
मंसिर १८ – सुर्खेत (कर्णाली)
मंसिर २० – जनकपुर (मधेश)
मंसिर २३ – हेटौँडा (बागमती)
धनगढीको आजको सभा नेकपाको प्रदेश–व्यापी अभियानको पहिलो चरण भएकाले नेतृत्वको संदेश, भीडको आकार र जनउत्साह पार्टीभित्र र बाहिर दुबैमा विशेष चासोका रूपमा हेरिएको छ।
