गोरखा, १६ असोज। गोरखाको गण्डकी गाउँपालिका वडा नं. ४ स्थित दीपा पहरोमा गएको पहिरोका कारण अवरुद्ध भएको सडक खुलाउने काम तीव्र गतिमा भइरहेको छ । वडा नं. ३ र ४ मा डोजरको अभाव भएपछि एक स्क्याभेटर र एक जेसीबी ल्याएर पहिरो पन्छाउने काम सुरु गरिएको हो ।
हिजो बिहानदेखि सुरु भएको पहिरो पन्छाउने काम अहिले कौदी खोलासम्म पुगेको छ । गण्डकी गाउँपालिकाका अध्यक्ष दीपक तिमिल्सिनाका अनुसार भोलि बेलुकासम्ममा सडक सञ्चालनमा ल्याउने लक्ष्य राखिएको छ ।
पहिरोका कारण स्थानीयवासीको जनजीवन प्रभावित भएको छ । यातायात अवरुद्ध हुँदा दैनिक उपभोग्य वस्तुको अभाव हुन थालेको स्थानीयबासीको गुनासो छ ।
